Ապրիլի 19-ին ընդդիմադիր Հայ ազգային կոնգրեսի (ՀԱԿ) կենտրոնական գրասենյակի համակարգող Լևոն Զուրաբյանը հանդիպել է մայիսի 6-ին կայանալիք ՀՀ ԱԺ ընտրությունների կապակցությամբ Հայաստանում գտնվող ԱՊՀ դիտորդական առաքելության շտաբի ղեկավար Եվգենի Սլոբոդայի հետ:

Հանդիպման ընթացքում քննարկվել են Հայաստանում ընտրական գործընթացներին, ընտրացուցակների ուռճացմանը, արդեն տեղի ունեցած խախտումներին առնչվող հարցեր և, մասնավորապես, թիվ 7 ընտրատարածքում տեղի ունեցած միջադեպերը:

Քննարկվել են նաև ընտրությունների օրինականության վերահսկման արդյունավետ միջոցներն ու այդ կապակցությամբ Սլոբոդայի ղեկավարած դիտորդական առաքելության անելիքները: