Հասարակությունը «փողոց դուրս գալով» ոչինչ չի կարող անել գործող իշխանություններին, գտնում է քաղաքական և ընտրական տեխնոլոգիաների գծով փորձագետ Արմեն Բադալյանը: Այդ մասին նա հայտարարել է Երևանում կայացած մամլո ասուլիսում՝ մեկնաբանելով որոշ ընդդիմադիր առաջնորդների հայտարարությունները պայքարը իշխանությունների դեմ փողոցում շարունակելու մասին:
Ըստ նրա, հասարակությունն ուժ ունի ընտրություններում գործող իշխանությունների դեմ քվեարկելու համար, սակայն քաղաքական ուժերը չեն կարող պաշտպանել իրենց ձայները առանց արտաքին աջակցության:
Նա նշել է, որ բոլոր այն դեպքերում, երբ ընդդիմությունը հաղթել է «արաբական գարնան» կամ ԱՊՀ-ում «նարնջագույն հեղափոխությունների» (Ուկրաինա, Վրաստան, Մոլդովա, Ղրղզստան) արդյունքում, եղել է արտաքին միջամտություն: Բադալյանը նշել է նաև, որ միջազգային դիտորդների հայտարարությունները հայաստանյան ընտրությունների մասին պետք է դիտարկել եվրոպական քաղաքականության ընդհանուր համատեքստում: Ըստ նրա, Արևմուտքն ակնկալում է Հայաստանից, որ կվավերացվեն Հայ-թուրքական արձանագրությունները, կկարգավորվի ղարաբաղյան հակամարտությունը Մադրիդյան սկզբունքների հիման վրա, այդ տեսակետից Արևմուտքին ձեռնատու է այնպիսի խորհրդարանը, որտեղ բացարձակ մեծամասնությունը գործող իշխանություններին է պատկանում: