«Չիկագոյում տեղի ունեցած ՆԱՏՕ-ի գագաթաժողովին չմասնակցելու վերաբերյալ Հայաստանի նախագահ Սերժ Սարգսյանի որոշումը ճիշտ էր»,-հայտարարել է այսօր լրագրողներին ԳԱԱ Արևելագիտության ինստիտուտի տնօրեն Ռուբեն Սաֆրաստյանը: Ըստ նրա, դա տրամաբանական ու անհրաժեշտ որոշում էր, քանի որ գագաթաժողովում համատեղ հայտարարություն ընդունվեց, որի դրույթներից մեկում շեշտադրվում էր երկրի տարածքային ամբողջականության դերը: Այդ որոշումը, անշուշտ, առաջին հերթին ուղղված էր Մոլդովայի ու Վրաստանի աջակցությանը, սակայն, բնականաբար, չէր կարող անտեսվել Հայաստանի ու Ադրբեջանի ներկայացուցիչների կողմից: Բացի այդ, ՆԱՏՕ-ի հայտարարությունը հակասում է ԵԱՀԿ ՄԽ սկզբունքներին, ինչը ևս պայմանավորեց գագաթաժողովին չմասնակցելու նախագահի որոշումը:
Չիկագոյում մայիսի 20-21 տեղի ունեցավ ՆԱՏՕ-ի երկօրյա գագաթաժողովը, որը նվիրված էր իրավիճակին Աֆղանստանում:
