Հայաստանի իշխող Հանրապետական կուսակցությունը դեռևս չի կողմնորոշվել նոր վարչապետի հարցում, սակայն, ՀՀԿ-ից պատգամավոր Էդուարդ Շարմազանովի կարծիքով, չարժե փոփոխություններ ակնկալել:
Նման հայտարարությամբ Շարմազանովը լրագրողների առջև հանդես է եկել Հայաստանի նախագահ և ՀՀԿ ղեկավար Սերժ Սարգսյանի նախագահությամբ կուսակցության Խորհրդի և Գործադիր մարմնի նիստերի ավարտից հետո:
Շարմազանովի խոսքով` այսօրվա նիստում կուսակցությունը չի քննարկել կադրային նշանակումները կառավարությունում: Սակայն, նրա խոսքով, լուրջ տեղափոխություններ կառավարությունում չեն սպասվում:
Լրագրողների այն հարցին, թե արդյոք Տիգրան Սարգսյանը կարող է չդառնալ նոր վարչապետ, Շարմազանովը նշել է, որ իր անձնական կարծիքով` վարչապետի փոփոխություն տեղի չի ունենա:
Շարմազանովի խոսքով` համաձայն օրենքի` դեռևս ժամանակ կա ապագա կառավարության կազմը որոշելու համար, և ՀՀԿ-ն կքննարկի ու կլուծի այդ հարցն իր Գործադիր մարմնի առաջիկա նիստերում:
Շարմազանովը հաղորդել է միայն, որ Սամվել Նիկոյանը խորհրդարանից աշխատանքի կանցնի գործադիր իշխանությունում:
