Հունիսի 6-9-ը Վրաստանի մայրաքաղաք Թբիլիսիում տեղի է ունենալու KAVKAZ JAZZ FESTIVAL-ը, որին մասնակցելու է նաև Հայաստանը: Ինչպես հայտնում է փառատոնի պաշտոնական կայքը, Հայաստանը, փառատոնին, ներկայանալու է «Շարաք» ջազ-ռոք կվինտետով:
Բացի Անդրկովկասի երկրներից, փառատոնը կհյուրընկալի նաև Helmut Kaplan Trio-ն Ավստրիայից: Փառատոնը բացվելու է Գյոթեյի ինստիտուտում` «Գերմանական ջազ» լուսանկարչական ցուցահանդեսով:
«Շարաք» կվինտետը կազմավորվել է այս տարի, և պաշտոնապես ներկայացվել փետրվարի 19-ին: Հնգյակի կազմում են սաքսաֆոնահար Արմեն Հյուսնունցը, ստեղնահար Կարեն Մամիկոնյանը, կիթառահար Գագիկ Խուդավիրդին, հարվածահար Հակոբ Օրդակյանը, և բաս կիթառահար Էդգար Սահակյանը:
Խումբը կատարում է ջազի դասականների ստեղծագործություններ, ինչպես նաև խմբի ղեկավարի` Հյուսնունցի` ազգային երանգներով համեմված ստեղծագործությունները: