Երևանի խորհրդանիշներից մեկը` հայտնի քանդակագործ Լևոն Թոքմաջյանի հեղինակած ծաղկավաճառ Կարաբալայի արձանը վերադարձվել է իր նախկին տեղը` Աբովյան փողոց:

«Հուշարձանը տեղափոխելու հասարակական պահանջ կար, որը ներկայացվել էր քաղաքապետին: Եվ քաղաքապետն այդ հարցը ներկայացրեց քաղաքաշինության խորհրդին, որն էլ նման որոշում ընդունեց: Խորհուրդը որոշեց, որ ավելի նպատակահարմար է հուշարձանը տեղափոխել Աբովյան փողոց»,- PanARMENIAN.Net-ի թղթակցին է հաղորդել Երևանի քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանը: Նրա խոսքով` հուշարձանի կանգնեցման վայրն ընտրվել է Երևանի գլխավոր ճարտարապետ Նարեկ Սարգսյանի և արձանի հեղինակ Լևոն Թոքմաջյանի կողմից:

Լեգենդար ծաղկավաճառ Կարաբալան ծնվել է XX դարի սկզբին հարուստ ընտանիքում Երևանի թաղամասերից մեկում` Քանաքեռում: Նրա իսկական անունն է Ստեփան Հարությունյան: Ստեփանի ընտանիքին էին պատկանում «Ֆլորայի այգիներ» լայնարձակ այգիները մետրոյի Երիտասարդական կայարանի տեղում:

Խորհրդային կարգերի հաստատումից հետո Ստեփանի ընտանիքը կորցրեց իր ունեցվածքը: 1934-1936թթ. Ստեփանը դատապարտվեց «իշխանության հրապարակային վարկաբեկման» համար և հայտնվեց մի բանտախցում հայ մեծ բանաստեղծ Եղիշե Չարենցի հետ, որը Ստեփանին գովերգում է իր բանաստեղծություններից մեկում:

Աշխենը` Ստեփանի կինը, չսպասեց նրան և ամուսնացավ մեկ այլ մարդու հետ: Երբ Ստեփանը դուրս եկավ բանտից, նա չուներ ո'չ տուն, ո'չ կին, ո'չ որդի, որին նրան այլևս արգելեցին տեսակցել: Ստեփանը սկսեց Աստաֆյան փողոցում (այժմ` Աբովյան) ծաղիկներ բաժանել անցորդ աղջիկներին: Զամբյուղը ձեռքին էլ նա հիշվեց բազմաթիվ երևանցիների համար:

Կարաբալան մահացավ 70-ական թվականների սկզբին, համաձայն լեգենդի` սառեց փողոցում: Նրա գերեզմանի վայրը մինչ օրս անհայտ է:

1991-ին Աբովյան փողոցում կանգնեցվեց Լևոն Թոքմաջյանի հեղինակած Կարաբալայի հուշարձանը: