Այս պահի դրությամբ Սիրիայում կան ՀՀ քաղաքացիներ, բայց ստույգ թիվ ասել հնարավոր չէ: Այս մասին PanARMENIAN.Net-ի թղթակցի հետ զրույցում նշեց ԱԳՆ մամուլի խոսնակ Տիգրան Բալայանը:
«Սիրիայում բնակվում են ինչպես երկքաղաքացիներ, այնպես էլ ՀՀ քաղաքացիներ: Նաև բնակվում է հյուպատոսության ամբողջ անձնակազմը«», - ասաց Բալայանը:
PanARMENIAN.Net-ի թղթակցի այն հարցին, թե արդյոք նախարարությունը չի պատրաստվում Սիրիայից տարհանել ՀՀ քաղաքացիներին, Բալայանը նշեց, որ «նման որոշման մասին դեռ խոսք չի գնացել»: Սիրիայում ՀՀ դեսպանատունը շարունակում է իր բնականոն հունով աշխատել:
Արդեն մեկ տարուց ավելի է Սիրիայի տարբեր քաղաքներում շարունակվում են հակաիշխանական անկարգությունները, որոնք ուղղված են երկրի նախագահ Բաշար Ասադի դեմ: Դա ներքին շարունակական հակամարտություն է, որը արաբական գարնան մաս է կազմում: Թունիսի և Եգիպտոսի հեղափոխություններով ոգեշնչված` սիրիացի ցուցարարները դիմում են տարբեր տակտիկական գործողությունների, որոնք ուղղված են Բաաս կուսակցության գրեթե կեսդարյա իշխանության դադարեցմանը: Ի դեպ, քաղաքագետներն այս բախումները «աննախադեպ» են համարում: