Վերջին քաղաքացիական բողոքները Հայաստանում, մասնավորապես, պայքարը Մաշտոցի պուրակի համար, բողոքներն ընդդեմ «Հարսնաքարում» տեղի ունեցած բժիշկ Վահե Ավետյանի սպանության, վկայում են, որ երկրում ձախ հայացքներ են ձևավորվում: Այդ մասին Երևանում կայացած մամլո ասուլիսում հայտարարել է Կովկասի ինստիտուտի տնօրեն, քաղաքագետ Ալեքսանդր Իսկանդարյանը: Ըստ նրա, մեր քաղաքացիական ակտիվիստները պահում են իրենց այնպես, ինչպես դասական «նոր ձախերը» Եվրոպայում և Լատինական Ամերիկայում:
Իսկանդարյանը մասնավորապես առանձնացրեց նրանց պայքարը բնապահպանության համար, բողոքները հին շինությունների քանդման դեմ, սոցիալական արդարության պահանջները:
Իսկանդարյանը հավելել է, որ մասնավոր հարցերում, որոնք սպառնալիք չեն քաղաքական համակարգի համար, իշխանությունները զիջումների կգնան: Նա հայտարարեց նաև, որ չի կարծում, թե մինչ նախագահական ընտրությունները քաղաքացիական շարժումը կվերածվի որևէ լուրջ քաղաքական ուժի՝ նշելով, որ նրանք առիթից առիթ են գործում:
Քաղաքագետը նաև հորդորել է չհամեմատել այդ բողոքները արաբական գարնան հետ՝ նշելով, որ հայաստանյան իրադարձություններն ավելի նման են Լատինական Ամերիկայում կատարվող երևույթներին: Ըստ նրա, «արաբական գարուն» տերմինը հորինել են որոշ լրագրողներ ու քաղաքագետներ, դա ընդհանուր երևույթ չէ և տարբեր երկրներում ժողովրդական ընդվզման համար տարբեր հիմքեր կային:
