Սեռական դաստիարակությունը մարդու ընդհանուր դաստիարակության մի մասն է կազմում և, եթե այն թերի է, ապա դա կարող է բացասական ազդեցություն ունենալ մարդու հոգեբանական և մարդասեռական զարգացման վրա։ Լրագրողների հետ հանդիպմանն այս մասին այսօր ասաց սեքսապաթոլոգ–հոգեթերապևտ Մարատ Զաքարյանը։
«Սեռական դաստիարակությունն ունի մի քանի էտապ` ծնողական, փողոցի և դպրոցական, և կյանքի ամեն էտապում պետք է դաստիարակությունն իր յուրահատկությունն ունենա»։
Սեքսապաթոլոգի կարծիքով, սեռական դաստիարակության ամենապատասխանատու շրջանը սեռական հասունացման շրջանն է, որը սկսում է 11 տարեկանից և տևում մինչև 18 տարեկանը, քանի որ այդ տարիքում դեռահասի մոտ և´ ֆիզիկական և´ հոգեբանական փոփոխություններ են լինում։
Ըստ Զաքարյանի, եթե այդ տարիքում դեռահասը ճիշտ սեռական դաստիարակություն չստանա, հետագայում կարող է մեծ խնդիրների առջև կանգնել։
Նա անդրադարձավ նաև սեռական դաստիարակությանը վերաբերող գրականությանը` նշելով, որ այդ գրքերը հաճախ սխալներով թարգմանված են այլ լեզուներից և ոչ ամբողջական ինֆորմացիա են հաղորդում, ինչը շատ հաճախ սխալ է ուղղորդում մարդուն։
«Բացի այդ, գրքերը թարգմանված են և չեն կարող ամբողջական ինֆորմացիա տալ, քանի որ հարմարեցված չեն մեր մշակույթին և հոգեկերտվածքին»,–ասաց Զաքարյանը։
Ինչ վերաբերում է դպրոցներում սեռական դաստիարակության մասին դասաժամ ունենալուն, հանդիպման մյուս հյուրը` Երևանի պետական բժշկական համալսարանի սեքսապաթալոգիայի և ռեպրոդուկտոլոգիայի կլինիկայի բժիշկ Ռուզաննա Ազատյանն ասաց, որ դրա համար նախ պետք է ուսուցիչներին համապատասխան թրեյնինգներ անցնեն, քանի որ նրանք հաճախ ունենում են կոմպլեքսներ`աշակերտներին նմանատիպ ինֆորմացիա հաղորդելիս։
