Հայաստանում քարոզելու իրավունք ունի միայն Հայ Առաքելական եկեղեցին: Այդ մասին այսօր Երևանում կայացած մամլո ասուլիսում հայտնեց ՀՀ ԶՈՒ հոգևոր սպասավոր Տեր Կորյուն քահանա Կարապետյանը: «Ես գտնում եմ, որ կրոնական փոքրամասնությունները, որոնք քարոզչություն են ծավալում, պետք է պատիժ կրեն: Դրանով նրանք խարխլում են պետության հիմքերը: Եթե մեկն աղանդավոր է, դա իր խնդիրն է, ես նրա դեմ ոչինչ չունեմ, բայց թող գործունեություն չծավալի, չտարածի իր աղանդը` քայքայելով ժողովրդին»,- ընդգծեց քահանան:
Անդրադառնալով 2011թ. ԱՄՆ Պետքարտուղարության զեկույցում կրոնական փոքրամասնությունների հանդեպ ճնշումների արձանագրմանը Հայաստանում` Տեր Կորյունը նշեց, որ զեկույցում խոսվում է հոգևոր անվտանգության մասին, որը հստակ սահմանում չունի: «Նրանք չեն հստակեցնում` արդյոք այդ հոգևոր անվտանգությունը վերաբերում է ազգային կամ պետական անվտանգությանը: Հոգևոր անվտանգությունը մի բառակապակցություն է, որն արժևորվում է արևմտյան, եվրոպական երկրների կողմից: Դա սին արտահայտություն է և բովանդակություն զուրկ»,- ասաց նա` հավելելով, որ եկեղեցին և ազգը մեկ են և միասին պետք է ձգտեն տեղ գտնել համաշխարհային համայնքում:
