«Մրցումից հետո ավելի լավ գիտակցեցի, որ իրականում Օլիմպիական արծաթե մեդալն էլ է բարձր պարգև: Իսկապես, շատ ուրախ եմ, որ կարողացել եմ արծաթե մեդալակիր դառնալ»,- լրագրողների հետ հանդիպման ժամանակ նշեց Օլիմպիական արծաթե մեդալակիր, աշխարհի արծաթե և բրոնզե մեդալակիր և Եվրոպայի չեմպիոն Արսեն Ջուլֆալակյանը:
Ջուլֆալակյանը ասաց, որ իր նպատակն է եղել անպայման մեդալ նվաճել Լոնդոնի Օլիմպիական խաղերում և դրա համար այս ողջ ընթացքում տքնաջան աշխատել է:
«Ես գեղեցիկ մենամարտեր անցկացրի, մինչև եզրափակիչ իմ մրցակիցներին ոչ մի միավոր չեմ տվել ու նրանց բոլորին էլ հաղթել եմ երկու մրցափուլերում: Սակայն եզրափակիչում չկարողացա մարտն ավարտել իմ օգտին ու պարտվեցի»,- ավելացրեց մարզիկը:
Մի քանի շաբաթ հանգստանալուց հետո նա կվերսկսի մարզումները և կնախապատրաստվի արդեն մյուս առաջնություններին ու միջազգային մրցաշարերին:
