Վալետայի «Տա Կալի» մարզադաշտում ավարտվեց Մալթա- Հայաստան ֆուտբոլային հանդիպման առաջին խաղակեսը:
Աշխարհի առաջնության ընտրական փուլի մեկնարկային խաղը հայ ֆուտբոլիստները սկսեցին ակտիվորեն: Առաջին իսկ րոպեներից նրանք նախաձեռնությունը վերցրին իրենց ձեռքը և սկսեցին կազմակերպել մի շարք գրոհներ:
Հանդիպման 17 րոպեին հայ ֆուտբոլիստները կարող էին բացել խաղի հաշիվը. Հենրիկ Մխիթարյանը մուտք գործեց տուգանային հրապարակ և փոխանցում կատարեց Յուրա Մովսիսյանին, վերջինս էլ գնդակը թողեց Լևոն Հայրապետյանին: Սակայն Հայրապետյանը չկարողացավ գրավել մրցակցի դարպասը:
Այս գրոհից հետո Հայաստանի ընտրանին սկսեց էլ ավելի կազմակերպված ու արագ գործել, սակայն վտանգավոր գրոհներ չէր հաջողվում կազմակերպել:
Իսկ 30-րդ րոպեին Մարկոս Պիզելլին հեռահար հարվածով փորձեց գրավել դարպասը, սակայն հանդիպման գլխավոր մրցավարն այն չհաշվեց, և հաշիվը մնաց նույնը` 0:0:
Ու չնայած տարածքային հսկայական առավելությանը, Հայաստանի թիմն առաջին խաղակեսում այդպես էլ չկարողացավ գոլի հեղինակ դառնալ: Թիմերն ընդմիջման գնացին 0:0 հաշվով: