«Հայֆեստ» 10-րդ միջազգային թատերական փառատոնը հյուրընկալել է թուրքական Չիպլար Այակլար Կումպանյաս թատերախմբին, որը ներկայացրել է «Ճանապարհորդություն Կոմիտասի հետ» և Հրանտ Դինքին նվիրված մի ներկայացում:
Լրագրողների հետ հանդիպման ժամանակ թատերախմբի անդամ, մեր հայրենակից Միհրան Թադեոսյանը պատմեց, որ խմբում կա 2 հայ:
Կոմիտասին նվիրված ներկայացումը երաժշտական-պարային է, որի ուղիղ կեսն իմպրովիզացիա է: Ներկայացումն ուղեկցվում է Կոմիտասի լուսանկարներով: Դրա համար ավելի շատ մետաֆորաներ և պատկերներ են օգտագործված:
Նա պատմեց, որ թատերախումբը նպատակ չի դրել հայկական ներկայացումներ բեմադրել, և իր հիմնական հանդիսատեսը թուրքեր են:
«Ես արվեստագետ եմ, և իմ գործն եմ անում», -ասաց Միհրանը:
Խումբը մասնակցում է «Եվրասիա» հիմնադրամի կողմից ֆինանսավորվող Հայ-թուրքական թատերական պլատֆորմին, որի նպատակն է երկխոսություն հաստատել հայ և թուրք արվեստագետների միջև:
Այժմ թուրքական խումբն ու հայկական «Միհր» թատրոնը համագործակցության եզրեր են փնտրում: