Հայ արտադրողների տաղավարը մեծ հետաքրքրություն է առաջացրել Կիևում World Food Ukraine 2012 ցուցահանդեսի այցելուների մոտ:
Հայկական տաղավարում ներկայացվել են հյութեր, հրուշակեղեն, պահածոներ, չրեր, կոնյակ, գինի, աղբյուրի և հանքային ջուր, հայկական ընկերությունների արտադրության ձուկ և ձկնամթերք:
Ինչպես հայտարարել է Analitika.at.ua-ին տված մեկնաբանությունում Ուկրաինայի Հայերի միության նախագահ Վիլեն Շատվորյանը, նման ցուցահանդեսների անցկացումը խթանում է առևտրատնտեսական համագործակցությունը: «Անհրաժեշտ է ավելի ակտիվացնել Ուկրաինայի և Հայաստանի գործարար օղակների միջև գործնական կապերը»:
Ցուցահանդեսը տեղի է ունեցել հոկտեմբերի 31-ից նոյեմբերի 2-ը: Հայաստանի մասնակցության կազմակերպիչներն էին Զարգացման հայկական գործակալությունը և Հայաստանի գյուղական տարածքների զարգացման հիմնադրամը: Այս տարի ցուցահանդեսին մասնակցել են սննդամթերքի 200 արտադրողներ 20 երկրներից: