ՕԵԿ փոխնախագահ Մհեր Շահգելդյանը նոյեմբերի 17-ին կայացած ասուլիսի ժամանակ ասաց, որ ՕԵԿ-ը նախագահական ընտրություններում սատարելու է գործող նախագահ Սերժ Սարգսյանին: «Մենք մեր խոսքը ասել ենք, հավատարիմ ենք մեր խոսքին»,- ասաց նա:

Անդրադառնալով իրենց՝ ՀՀԿ-ի ստվերը լինելու մասին խոսակցություններին, Մհեր Շահգելդյանը կտրականապես հերքեց դա և որպես ապացույց նշեց քաղաքական խորհրդակցությունները, որոնց իրենք մասնակցել են, իսկ կոալիցիոն գործընկեր ՀՀԿ-ն՝ ոչ: «ՕԵԿ-ը ցուցադրական բաներ չի արել ու չի անելու: Մենք երբեք մեր դեմքն ու ինքնուրույնությունը ցույց տալու խնդիր չենք ունեցել», - ասաց Մհեր Շահգելդյանը:

Նրա խոսքով, իրենց քաղաքական գործունեությունը հաճախ համընկնում է ՀՀԿ գործունեության հետ միմիայն կոալիցիոն համագործակցությունից ելնելով, իսկ առաջիկա ընտրությունների ժամանակ ՕԵԿ-ը սատարելու է ոչ թե ՀՀԿ-ին, այլ Սերժ Սարգսյանին։