27 մայիսի 2005 - 11:18 AMT
ՀՀ ԱԳՆ ՂԵԿԱՎԱՐԸ ԵՄ-ԻՆ ԿՈՉ Է ԱՐԵԼ ՍՏԻՊԵԼ ԱՆԿԱՐԱՅԻՆ ԲԱՑԵԼ ՀԱՅԿԱԿԱՆ ՍԱՀՄԱՆԸ
Եվրամիությունը պետք է ուժեղացնի ճնշումը Թուրքիայի վրա` Հայաստանի հետ սահմանը բացելու հարցում: Այս մասին հայտարարել է Հայաստանի արտգործնախարար Վարդան Օսկանյանը, տեղեկացնում է «Ազատություն» ռադիոկայանը: ՀՀ ԱԳՆ ղեկավարը Եվրամիությանը կոչ է արել ավելի «հաստատակամ լինել» եւ «ստիպել Անկարային բացել վերջին փակ սահմանը Եվրոպայում»: «Թուրքական կողմը փակ է պահում սահմանը, ինչը անհասկանալի է մեզ համար, եւ մենք ակնկալում ենք, որ ԵՄ-ն ավելի հաստատակամ կլինի այս հարցում», - Հելսինկիում հայտարարել է Վ.Օսկանյանը: Ֆինլանդիայի ԱԳՆ ղեկավարի հետ հանդիպման ընթացքում մեկնաբանելով Հայոց ցեղասպանության փաստն ուսումնասիրելու նպատակով համատեղ հանձնաժողով ստեղծելու պաշտոնական Անկարայի առաջարկությունը` Վ.Օսկանյանն «անընդունելի» է անվանել թուրքական կողմի նախապայմանները: «Մենք պետք է հետեւենք եվրոպական մյուս երկրների օրինակին: Հազիվ թե Եվրոպայում կամ այլուր գտնվեն երկու երկրներ, որ տարաձայնություններ չունենան սեփական անցյալի մեկնաբանություններում: Դա, սակայն, նրանց չի խանգարում ունենալ նորմալ կապեր եւ դիվանագիտական հարաբերություններ»,- հայտարարել է Հայաստանի արտաքին քաղաքական գերատեսչության ղեկավարը: