«Ռոստելեկոմը»՝ Ռուսաստանի խոշորագույն դինամիկ զարգացող հեռահաղորդակցային խումբը, չի բացառում, որ կարող է աշխատել նաև Լեռնային Ղարաբաղում: «Դեռևս Ղարաբաղի վերաբերյալ պլաններ չունենք, բայց ես չեմ բացառում, որ հաջող զարգացումը Հայաստանում կարող է իր շարունակությունը ստանալ Լեռնային Ղարաբաղում»,-ասել է ռուսական ընկերության փոխնախագահ Նաում Մարդերը դեկտեմբերի 18-ին Երևանում կայացած մամլո ասուլիսում, որը նվիրված էր «Ռոստելեկոմի» մուտքին հայաստանյան շուկա:
ՋԻԷՆՍԻ-ԱԼՖԱ ՓԲԸ-ն՝ որպես «Ռոստելեկոմ» ԲԲԸ դուստր ձեռնարկություն, ՀՀ-ում սկսում է մատուցել հեռահաղորդակցության ծառայություներ «Ռոստելեկոմ» ապրանքանիշի ներքո:
Հանդիսանալով հեռահաղորդակցության ոլորտի առաջատար օպերատորներից մեկը՝ ՋԻԷՆՍԻ-ԱԼՖԱ ՓԲԸ-ն սկսում է մատուցել ֆիքսված հեռախոսակապի, ինտերնետ հասանելիության, շուտով նաև ինտերակտիվ հեռուստատեսության ծառայություններ ֆիզիկական անձանց համար:
Մարդերը հավելել է, որ տեխնիկական հարցերից բացի, կան նաև քաղաքական հարցեր: Այնուամենայնիվ, նա նշել է. «Մենք,լինելով կապի մարդիկ, սովոր ենք, որ միշտ հաշտեցնում ենք բոլոր կողմերին»:
Հայաստանում այդ ապրանքանիշի տակ աշխատող առաջին վաճառասրահը արդեն բացվել է Աբովյան քաղաքում: