«Օրինաց երկիր» կուսակցությունը 2013 թվականի նախագահական ընտրություններում սատարելու է ՀՀ գործող նախագահ, ՀՀԿ նախագահ Սերժ Սարգսյանի թեկնածությունը:
Այս մասին այսօր հայտարարվել է ՕԵԿ արտահերթ 11-րդ համագումարի ժամանակ, որը կայանում է Կարեն Դեմպիրճյանի անվան մարզահամերգային համալիրում:
«Մենք հայտարարում ենք, որ սատարելու ենք Սերժ Սարգսյանի թեկնածությունը` պատասխանատվություն ստանձնելով համագործակցելու երկրի հետագա կայուն զարգացման, պետության առջև ծառացած արտաքին և ներքին մարտահրավերներին ըստ արժանվույն դիմակայելու, ժողովրդավարական բարեփոխումները խորացնելու գործում»: ՕԵԿ-ն աջակցելու է արդար, ազատ և թափանցիկ նախագահական ընտրությունների անցկացմանը:
Նշվել է նաև, որ շարունակելու է Հայաստանի Հանրապետական կուսակցության հետ հուսալի և վստահելի կառուցողական համագործակցությունը, նպատակ ունենալով խորացնել ժողովրդավարական բարեփոխումները և արդյունավետ իրականացնել ՕԵԿ և ՀՀԿ նախընտրական ծրագրերի համադրությամբ գործունեության միասնական քաղաքականությունը:
