ԱՄՆ նախագահ Բարաք Օբամայի կայքում կազմակերպվել է ստորագրահավաք հայ-թուրքական սահմանի բացման համար: Ստորագրահավաքի մասնակիցները ցանկանում են, որ Թուրքիան առանց նախապայմանների բացի սահմանը սիրիահայ փախստականների համար:
«Ստորագրահավաքին մասնակցելով` մենք կրկնակի կրճատում ենք սիրիահայերի` Հայաստան գալու դժվարությունները, քանի որ այսօր սիրիահայերը անցնում են կրկնակի երկար ճանապարհ, մտնում են իրենց համար բացարձակապես անծանոթ և անցագիր պահանջող Վրաստան:
Բաց սահմանի դեպքում հնարավոր կլինի առավոտյան Հալեպից դուրս գալով ուշ երեկոյան հասնել Երևան: Ավելի քան 60.000 մարդ է սպանվել Սիրիայում ընթացող պատերազմի հետևանքով:
Սիրիայում բնակվում են 200.000 հայեր, որոնց մեծ մասը ցանկանում է գալ Հայաստան:
Սիրիայից Հայաստան եկող ճանապարհը անցնում է Թուրքիայով, որը փակել է Հայաստանի հետ սահմանը դեռ 1993-ին, և դա մեծ դժվարություններ է ստեղծում փախստականների համար:
Ուստի, մենք խնդրում ենք կոչ անել Թուրքիային, որ վերջինս բացի իր ցամաքային սահմանը Հայաստանի հետ (գոնե փախստականների համար) առանց որևէ նախապայմանի:
21-րդ դարում փակ սահմաններ չպետք է լինեն»,-ասված է ստորագրահավաքի կազմակերպիչների տարածած հաղորդագրության մեջ: