1 հուլիսի 2005 - 13:35 AMT
ԼԻԲԱՆԱՆԻ ԱԶԴԵՑԻԿ ՀԱՅ ՀԱՄԱՅՆՔԸ ԿԱՄՈՒՐՋ Է ԵՐԿՈՒ ԵՐԿՐՆԵՐԻ ՄԻՋԵՎ
Հայաստանի արտգործնախարար Վարդան Օսկանյանն այսօր հանդիպել է Լիբանանի խորհրդարանի խոսնակ Նաբիհ Բերրիին, տեղեկացնում է ՀՀ ԱԳՆ մամուլի ծառայությունը: Հայաստանի արտաքին քաղաքական գերատեսչության ղեկավարը շնորհավորել է Ն. Բերրիին խորհրդարանի նախագահի պաշտոնում վերընտրվելու կապակցությամբ: Զրուցակիցները գոհունակություն են հայտնել 1993թ. հիմք դրված հայ-լիբանանյան միջխորհրդարանական համագործակցության շարունակական զարգացումից, մասնավորապես, խորհրդարանների նախագահների տեղի ունեցած փոխադարձ այցելություններից, ստեղծված միջխորհրդարանական բարեկամության պատգամավորական խմբերից: Կողմերը քննարկել են գործնական կապերն առավել ամրապնդելու եւ առաջիկայում փոխայցելություններն ակտիվացնելու հետ կապված հարցեր: Այդ առումով Նաբիհ Բերրին կարեւորել է Լիբանանի խորհրդարանի ազգությամբ հայ պատգամավորների դերը` ավելացնելով, որ Լիբանանի ազդեցիկ հայ համայնքը կապող կամուրջ է երկու երկրների միջեւ: Նշենք, որ 2005թվականին Լիբանանում խորհրդարանական վերջին ընտրություններում պատգամավորական մանդատ են ստացել հայ համայնքի վեց պատվիրակներ: