Այսօր ՀՀ ոստիկանության պետի առաջին տեղակալ, ոստիկանության գեներալ-մայոր Հունան Պողոսյանն ընդունել է ԱՊՀ երկրների գործադիր կոմիտեի դիտորդական առաքելության ղեկավար, գործադիր կոմիտեի նախագահի առաջին տեղակալ Վլադիմիր Գարկունի գլխավորած պատվիրակությանը: Այս մասին PanARMENIAN.Net-ին հայտնում են Ոստիկանության հասարակայնության հետ կապերիի և տեղեկատվության վարչությունից:
Հունան Պողոսյանը հյուրերին ներկայացրել է ՀՀ նախագահական ընտրությունների բնականոն ընթացքն ապահովելու և պատշաճ հասարակական կարգ պահպանելու նպատակով ոստիկանության կենտրոնական ապարատում ստեղծված օպերատիվ շտաբի գործառույթները, կատարված աշխատանքը և առաջիկա խնդիրները:
Օպերատիվ շտաբի պետը մասնավորապես նշել է, որ զգալի աշխատանք է կատարվել ընտրողների ցուցակների կատարելագործման, ընտրատեղամասերում ծառայության նախապատրատվող ոստիկանների ուսուցման, ստացվող ահազանգերին և զանգվածային լրատվության միջոցների հրապարակումներին արագ ու առարկայական արձագանքելու և մի շարք այլ ուղղություններով:
Հյուրերը ներկայացրել են իրենց հետաքրքրող հարցերը և գնահատականները նախընտրական շրջանում ոստիկանության գործունեության վերաբերյալ ու հավաստիացրել, որ սերտ համագործակցությունը ոստիկանության հետ նաև իրենց առաքելության հաջողության գրավականներից է: