Ինչպես արդեն հայտնել էինք, «Ժառանգություն» կուսակցության ներկայացուցիչները ՍԴ ներկայացրեցին ընտրությունների վերջնական արդյունքներն անվավեր ճանաչելու պահանջով դիմումը:
Դատարանից դուրս գալուց հետո լրագրողների հետ ճեպազրույցում կուսակցության մամուլի խոսնակՀովսեփ Խուրշուդյանն ասաց, որ Սահմանադրական դատարան դիմելու բոլոր իրավական հիմքերը կան և այս կերպ իրենք հնարավորություն են տալիս դատավորներին «իրենց վրայից մաքրելու» կեղծ ընտրությունները լեգիտիմացնելու փորձը: Խուրշուդյանը նշեց նաև, որ պայքարը քաղաքական դաշտում շարունակվելու է և սա միայն իրավական ճանապարհն է.
«Այս երկու ճանապարհները զուգահեռ են, մենք պահանջում ենք վավերացնել ժողովրդի հաղթանակը և Րաֆֆի Հովհաննիսյանին հռչակել ՀՀ նախագահ: Եթե մերժեն, դա կլինի հակասահմանադրական քայլ», - ասաց նա՝ նկատելով, որ սա երկրի ներսում եղած վերջին իրավական ճանապարհն է:
Նշենք, որ Սահմանդրական դատարանը դիմումը կքննարկի 10 օրվա ընթացքում: