ԵՄ-ն կարող է դադարեցնել համագործակցությունը Ադրբեջանի հետ
Եվրամիության արտաքին հարաբերությունների հարցերով հանձնակատար Բենիտա Ֆերերո-Վալդներն նախօրեին ասել է, որ Ադրբեջանին սպառնում է «Ընդլայնված Եվրոպա. նոր հարեւաններ» ծրագրից ետ մնալու վտանգը: Պատճառը Հյուսիսային Կիպրոսի Թուրքական ինքնահռչակ հանրապետության հետ կապեր հաստատելն է: Միջազգային համայնքի, այդ թվում Եվրամիության կողմից ճանաչվել է միայն ամբողջական Կիպրոսը: Այժմ այդ երկիրն արգելափակում է Ադրբեջանի առաջխաղացումը «Նոր հարեւաներ» ծրագրում, քանի որ Ադրբեջանն օդային հաղորդակցություն է հաստատել Հյուսիսային Կիպրոսի հետ: «Ես ադրբեջանցիներին պարզարոշ ասել եմ, որ եթե նրանք չփոխեն իրենց դիրքորոշումը, մենք առաջ կտանենք «Նոր հարեւաններ» ծրագիրը Վրաստանի եւ Հայաստանի հետ: Այնուամենայնիվ, մենք հուսով ենք, որ Ադրբեջանը լուծում կգտնի», - ասել է Բենիտա Ֆերերո-Վալդները:
