Ստամբուլի դատախազությունն ավարտել է հայ լրագրող Սևան Նիշանյանի գործով դատավարությունը և պահանջում է դատապարտել նրան 1,5 տարվա ազատազրկման «ժողովրդի մի մասի կրոնական զգացմունքները վիրավորելու համար»:
Նիշանյանը չի ճանաչում ներկայացված մեղադրանքը, պնդում է, որ դատարան դիմած մարդիկ «ծանոթ չեն խոսքի ազատության մասին օրենքին» և ինքը չի պատրաստվում պաշտպանվել դատարանում:
«Պաշտպանվել կնշանակի ճանաչել այս գործի օրինական լինելը: Ես պատասխանատու եմ իմ խոսքերի համար»,-ասել է Նիշանյանը, հայտնում է «Ակոս» թերթը:
«Երկրում շատ են անկիրթ մարդիկ, որոնք աջ ու ձախ բոլորի վրա կեղտ են շպրտում: Ես մեղադրական եզրակացությունը կարդալու ոչ ժամանակ ունեմ, ոչ էլ համբերություն: Ես չեմ պատրաստվում պաշտպանվել այսպիսի հիմար դատավարության ընթացքում»,-հայտարարել է նա:
Նա ասել է, որ եթե իրեն դատապարտեն 1,5 տարվա ազատազրկամն, ապա դա միայն կվնասի Թուրքիային՝ ցույց տալով աշխարհին, թե ինչպես է աշխատում թուրքական դատարանը:
