ՀՀ նախագահի նախկին թեկնածու, էպոսագետ ներկայացող Վարդան Սեդրակյանը մեկ ամիս է, ինչ կալանավորվել է, սակայն նրա փաստաբան Ալեքսանդր Սիրունյանի պնդմամբ, նախաքննական մարմնից դեռ որևէ ապացույց չեն ստացել: Այսօր լրագրողների հետ հանդիպման ժամանակ փաստաբանը չբացառեց, որ Վարդան Սեդրակյանի դեմ քաղաքական հետապնդում է իրականացվում, սակայն հավանական չհամարեց, որ այդ կերպ ուզում են նախընտրական քարոզարշավի ժամանակ «մեծ-մեծ» խոսելու համար պատժել իր պաշտպանյալին: «Պատժելու այլ ձևեր կան, քան 12 տարվա կամ ցմահի հոդվածներ դնելը»,-ասաց նա:
Ալեքսանդր Սիրունյանը տեղեկացրեց, որ այս գործով ավելի վաղ կալանավորված Խաչատուր Պողոսյանը և Սամվել Հարությունյանը Վարդան Սեդրակյանի դեմ ցուցմունքներ չեն տվել: Նա նաև նշեց, որ իրենք դիմել են քննիչին` իր պաշտպանյալի լյարդի լրացուցիչ հետազոտության համար:
