Բուենոս Այրեսի Իրավաբանական ինստիտուտից այսօր հայ երիտասարդները երթով կշարժվեն դեպի Թուրքիայի դեսպանատուն:
Ինչպես PanARMENIAN.Net-ի թղթակցին հայտնեց Բուենոս Այրեսի հայ երիտասարդների Միության անդամ Եվգենիա Հակոբյանը, երթին միանալու է նաև Խաղաղության Նոբելյան մրցանակակիր Ադոլֆո Պերես Էսկիբելը:
«Դեսպանատան բակում մենք հանդես կգանք դիմումով` կոչ անելով Թուրքիային ընդունել Հայոց Ցեղասպանությունը: Այնտեղ ելույթ կունենա նաև Պերես Էսկիբելը»,- նշեց Հակոբյանը:
Ըստ նրա, բացի այս միջոցառումից, հայկական տարբեր երիտասարդական միություններ այսօր կկազմակերպեն տարբեր միջոցառումներ` հարգանքի տուրք մատուցելով Հայոց Մեծ Եղեռնի զոհերի հիշատակին:
«Իսկ այս պահին Բուենոս Այրեսի կենտրոնական եկեղեցում մատուցվում է պատարագ: Պատարագ կմատուցվի նաև մեր հայկական եկեղեցում»,- ավելացրեց նա:
