Այսպիսի վատ արդյունք Հայաստանի ձյուդոյի հավաքականը դեռ չէր արձանագրել, PanARMENIAN.Net-ի թղթակցին ասաց հավաքականի գլխավոր մարզիչ Տիգրան Բաբայանը:
Հայ ձյուդոիստները Եվրոպայի առաջնությունում ոչ միայն մեդալ չկարողացան նվաճել, այլև հաղթահարել առաջին մրցակցի արգելքը: Բոլորը, բացի Արմեն Նազարյանից, պարտվեցին հենց մեկնարկային գոտեմարտում: «Չգիտեմ, թե ինչն էր նման անհաջողության պատճառը: Մենք անցկացրել ենք լավ մարզումներ, ունեցել ենք միջազգային մրցաշարեր: Կարծում եմ, ձյուդոիստներին խանգարեց հոգեբանական պատրաստվածությունը»,- նշեց Բաբայանը:
Մարզիչը խոստովանեց, որ ինքը մեդալների ակնկալիքներ չի ունեցել երիտասարդ ձյուդոիստներ Մհեր Կարապետյանից, Ռաֆայել Դավթյանից և Գոռ Հարությունյանից, սակայն նա շատ հիասթափված է Հովհաննես Դավթյանի, Արմեն Նազարյանի և Հակոբ Առաքելյանի ելույթներից:
«Ես ակնկալում էի, որ նրանք կկարողանան պայքարել մեդալների համար: Դավթյանի վիճակահանությունն այնպիսին էր, որ նա առնվազն պետք է մտներ եզրափակիչ, սակայն ոչինչ չստացվեց»,- ավելացրեց Բաբայանը:
