Լատվիայի Սեյմի նախագահ Սոլվիտա Աբոլտինայի հրավերով հունիսի 4-ին սկսվել է ՀՀ ԱԺ նախագահ Հովիկ Աբրահամյանի գլխավորած պատվիրակության պաշտոնական այցը Լատվիայի Հանրապետություն:
Աբոլտինան բարձր է գնահատել երկու երկրների միջև ձևավորված քաղաքական հարաբերությունները: Նա անհրաժեշտ է համարել միջխորհրդարանական համագործակցության հետագա զարգացումը և խորացումը` համոզմունք հայտնելով, որ ԱԺ նախագահ Հովիկ Աբրահամյանի պաշտոնական այցը Լատվիա նոր լիցք կհաղորդի երկկողմ համագործակցությանը: Լատվիայի խորհրդարանի ղեկավարը նշել է, որ խորհրդարանների միջև գործակցության խորացմանը նպաստում են բարեկամության խմբերը և ուրախությամբ տեղեկացրել, որ Հայաստանի ԱԺ հետ բարեկամության խումբը ամենամեծաթիվներից է. այնտեղ ընդգրկված են 34 պատգամավորներ:
Նա բարձր է գնահատել Հայաստան-ԵՄ հարաբերությունների զարգացման տեմպերը և պատրաստակամություն է հայտնել փոխանցելու եվրաինտեգրման գործընթացում լատվիական փորձը: Սոլվիտա Աբոլտինան կարևոր է համարել նաև տնտեսական հարաբերությունների զարգացումը և ակտիվացումը` նշելով, որ այս ոլորտում չօգտագործված հնարավորություններ կան: Սաեյմայի նախագահը կարևորել է համագործակցությունը ԵՄ Արևելյան գործընկերության շրջանակում, փոխգործակցությունը միջազգային կառույցներում:
Շնորհակալություն հայտնելով հրավերի և ջերմ ընդունելության համար` Հովիկ Աբրահամյանը վստահություն է հայտնել, որ երկու երկրների բարեկամական կապերի վրա հիմնված համագործակցությունն առավել կամրապնդվի և կզարգանա: Միջպետական հարաբերությունների խորացման առումով` Հովիկ Աբրահամյանը կարևորել է միջխորհրդարանական հարաբերությունների զարգացումն ու խորացումը: ԱԺ նախագահը գոհունակությամբ փաստել է, որ վերջին շրջանում հայ-լատվիական քաղաքական օրակարգը բավական հագեցած է եղել, ինչը միանշանակ վկայում է հարաբերությունները Էլ ավելի զարգացնելու երկուստեք ցանկությունը:
