«Համագործակցություն-2013» խորագիրը կրող սայլակից օգտվող հաշմանդամություն ունեցող անձանց միջազգային մարաթոնի մասնակիցները հանդիպել են ՀՀ աշխատանքի և սոցիալական հարցերի նախարար Արտեմ Ասատրյանի հետ։
Ասատրյանը հանդիպման ընթացքում նշել է, որ վերջին տարիներին ականատեսն ենք հաշմանդամություն ունեցող անձանց նկատմամբ հասարակական վերաբերմունքի, և որ ամենակարևորն է` հենց հաշմանդամություն ունեցող անձանց իրենց իսկ ուժերի նկատմամբ փոփոխությանը: Նախարարը նշել է, որ հանրապետությունում կա զբաղվածության խնդիր, այդ թվում և հաշմանդամություն ունեցող անձանց շրջանում։
ՀՀ-ում հաշմանդամություն ունեցողների թիվը մոտ 180 հազար է, նրանցից միայն 9 տոկոսն է զբաղված: Այդ իսկ պատճառով օրենքում գործնական փոփոխություններ են նախատեսվում, որպեսզի հնարավոր լինի լուծել հաշմանդամություն ունեցող անձանց զբաղվածության խնդիրը։
«Օրենքի նախագծում մենք ամրագրեցինք, որ բոլոր կազմակերպությունները, որոնք ունեն 100 և ավելի աշխատակից, առնվազն 1 տոկոս պետք է ունենան նաև հաշմանդամություն ունեցող աշխատակիցներ: Իսկ այն կազմակերպությունները, որոնք չեն կատարի այս պահանջը, պարտավորված կլինեն որոշակի ֆինանսական միջոցներ տրամադրել հատուկ հիմնադրամին»,- ասել է նա:
Նախարարի հետ հանդիպումից հետո մարաթոնի մասնակիցները երթով շարժվել են դեպի Հյուսիսային պողոտա, որտեղ անցկացրին ֆլեշ-մոբ ակցիա։