«Բազմազգ Վրաստան» հասարակական կազմակերպության նախագահ Առնոլդ Ստեփանյանը PanARMENIAN.Net-ի թղթակցի հետ զրույցում հաստատեց վրացական լրատվամիջոցներում տարածված տեղեկությունը, որ Վրաստանի իրավապահ մարմինները բերման են ենթարկել ջավախահայ ակտիվիստ, նախկին քաղբանտարկյալ Վահագն Չախալյանի եղբորը` Արմեն Չախալյանին:
Առնոլդ Ստեփանյանը տեղեկացրեց, որ գյուղում մոտ հիսուն երիտասարդների հետ միջադեպ է եղել, և քանի որ Արմեն Չախալյանը հեղինակություն է վայելում, նրան իր ընկերների կանչել են, որպեսզի հարթի կռիվը: Այդ ժամանակ էլ հատուկ ուժերը ձերբակալել են նրան և մոտ 30 երիտասարդի ու տարել Ախալցխա: Նա նաև տեղեկացրեց, որ այսօր նրանց մոտ փաստաբան է գնալու:
Առնոլդ Ստեփանյանը նշեց, որ մի լուրջ խնդիր էլ կա, ձերբակալվածների մեջ շաքարային դիաբետով հիվանդ երիտասարդ կա, ում չեն կարողանում դեղամիջոց փոխանցել: Թե կոնկրետ պատճառը որն է, դեռ պարզ չէ:
Հարցին` հնրավո՞ր է, որ Չախալյանի եղբոր ձեռբակալությունը քաղաքական ենթատեքստ ունենա, Առնոլդ Ստեփանյանը պատասխանեց. «Մի քանի վարկածներ են շրջանառվում: Նա այն, որ մի քանի օր առաջ Վահագն Չախալյանը ընդդեմ Վրաստանի նախագահ Միխեյիլ Սահակաշվիլու դատական հայց է ներկայացրել, որը մերժվել էր: Երկրորդ վարկածն այն է, որ այսպիսով փորձում են այնպես անել, որ Վահագնը հանկարծ չակտիվանա: Տարբեր մարդիկ տարբեր բաներ են ասում»:
Առնոլդ Ստեփանյանն ընդգծեց, որ Վահանգն Չախալյանի ձերբակալության ժամանակ այստեղ բոլոր աշխատանքները ղեկավարում էին ներքին գործերի այն աշխատակիցները, ովքեր այսօր էլ աշխատում են: «Նրանք այն ժամանակ էլ շատ խիստ էին վերաբերում այս շրջանին: Հիմա էլ կոնկրետ Ջավախքով են զբաղվում»,- ասաց «Բազմազգ Վրաստանի» նախագահը: