Հայ ոստիկանները ռուս գործընկերներին կօգնեն ապահովել ձմեռային Օլիմպիադայի անվտանգությունը այդ նպատակով մի խումբ ոստիկաններ կգործուղվեն Սոչի: Այս մասին Սոչիում կայացած Իրավապահ գերատեսչությունների միացյալ կոլեգիայի նիստի ժամանակ ասել է Ռուսաստանի Ներքին գործերի նախարար Վլադիմիր Կոլոկոլցևը, փոխանցում է ՌԻԱ Նովոստին:
«Հանդիպման ժամանակ մենք քննարկել ենք Օլիմպիադայի անվտանգության ապահովման խնդիրները և պայմանավորվել ենք, որ Հայաստանից փորձառություն ունեցող ոստիկանության աշխատակիցները Սոչի կգործուղվեն և այնտեղ աջակցություն կցուցաբերեն, եթե որևէ խոչընդոտ առաջանա»,-ասել է Վլադիմիր Կոլոկոլցևը:
Իր հերթին Հայաստանի ոստիկանապետ Վլադիմիր Գասպարյանը նշել է, որ վերջին շրջանում Ռուսաստանի Ներքին գործերի նախարարությունը և Հայաստանի ոստիկանությունն արդեն ոչ միայն համագործակցում են, այլև փաստացի միասին են աշխատում: «Տեղեկատվությունից բացի, մենք պատրաստ ենք օգնել նաև կոնկրետ աշխատակիցներով, որպեսզի մեր ներդրումն ունենանք Սոչիի Օլիմպիադայի անվտանգության ապահովման գործում»,- ասել է ՀՀ ոստիկանապետը:
