Մեկ շաբաթ առաջ Հայաստանի և Ռելյատիվիստական աստղաֆիզիկայի միջազգային կենտրոն-ցանցի միջև կնքվել է պայմանագիր, ըստ որի Երևանը դարձել է Ռելյատիվիստական աստղաֆիզիկայի տարածաշրջանային կենտրոն:
«Սա ցույց է տալիս, որ աստղաֆիզիկան Հայաստանում առաջնային տեղում է, բացի այդ էլ, մենք հնարավորություն ունենք մեր մասնագետներին ուղարկել Եվրոպա, որպեսզի այնտեղ նրանք ստանան կրթություն: Մեր երկիր կգան արտասահմանից գիտնականներ, և համատեղ գիտական աշխատանքներ կարող ենք կատարել»,- լրագրողների հետ հանդիպման ժամանակ ասաց Բյուրականի աստղադիտարանի տնօրեն Հայկ Հարությունյանը:
Նախատեսվում է, որ կենտրոնի շտաբ-բնակարանը կլինի Գիտությունների Ակադեմիայի տարածքում, սակայն հիմնական աշխատանքային տարածքները կլինեն Բյուրականի աստղադիտարանում: «Այստեղ կաշխատեն ինչպես մեր, այնպես էլ այլ երկրներից եկած գիտնականները: Հիմքը դրված է, արդեն հայտարարված է առաջին գիտաժողովի ժամկետը, այն կկայանա մյուս տարվա հունիսի վերջին»,- ընդգծեց Հարությունյանը:
