ՀՀ Ազգային ժողովի աշխատակազմի ղեկավար Գուրգեն Դումանյանն օրերս աշխատանքային այցով գտնվել է Ստեփանակերտում: ՀՀ Ազգային ժողովի աշխատակազմի ղեկավարը հանդիպել է ԼՂՀ Ազգային ժողովի աշխատակազմի ղեկավար Գարիկ Ժամհարյանի հետ: Այս մասին տեղեկանում ենք ՀՀ ԱԺ Հասարակայնության և լրատվության հետ կապերի վարչությունից:
Հանդիպման ընթացքում քննարկվել են Հայաստան-Արցախ միջխորհրդարանական համագործակցության հեռանկարները, երկու հայկական խորհրդարանների աշխատակազմերի փոխգործակցության խթանմանն ու զարգացմանն առնչվող հարցեր:
ՀՀ և ԼՂՀ խորհրդարանների աշխատակազմերի ղեկավարները, կարևորելով միջխորհրդարանական կապերը, ցանկություն են հայտնել ակտիվացնել ու խորացնել համագործակցությունը: Նրանք անդրադարձել են խորհրդարանների աշխատակազմերի տարբեր ծառայությունների պատասխանատուների փոխայցելությունները պարբերաբար կազմակերպելուն և խորհրդարանական տարաբնույթ միջոցառումներին գործընկերների մասնակցությունն ապահովելուն:
Հանդիպման ավարտին ձեռք են բերվել համապատասխան պայմանավորվածություններ, որոնք կնպաստեն Հայաստան-Արցախ միջխորհրդարանական համագործակցության աշխուժացմանը և արդյունավետությանը:
