ՀՀ ՊՆ. Ադրբեջանցի գերին կվերադառնա հայրենիք, անկախ հայ գերու հարցում Ադրբեջանի որոշումից
Անկախ ադրբեջանական իշխանությունների որոշումից, Հայաստանը հավատարիմ է մնալու միջազգային մարդասիրական և մարդու իրավունքների ոլորտում հանձնառություններին: Այս մասին ասել է ՊՆ մամուլի քարտուղար Արծրուն Հովհաննիսյանը` անդրադառնալով հարցին, թե արդյոք հայաստանյան իշխանությունները սպասում են վերջերս Ադրբեջանի տարածքում գերեվարված ՀՀ քաղաքացու վերաբերյալ Ադրբեջանի որոշմանը` ադրբեջանցի ռազմագերու հարցում համապատասխան քայլեր ձեռնարկելու նպատակով:
«Մենք գործելու ենք համապատասխան միջազգային կազմակերպությունների հետ ստորագրած բոլոր փաստաթղթերով և համաձայնություններով ստանձնած պարտականությունների, այդ թվում` ադրբեջանցի ռազմագերու հետագա կարգավիճակի վերաբերյալ նրա ոչ պակաս կարևոր` ազատ, անկաշկանդ և գիտակից որոշման», - ասել է Արծրուն Հովհաննիսյանը:
