ՀՀ ԱԳ նախարար Վարդան Օսկանյանն ընդունեց տարածաշրջանային այցով Հայաստանում գտնվող Ռուսաստանի Դաշնության արտաքին գործերի նախարարի տեղակալ Գրիգորի Կարասինին: Ինչպես հաղորդում է ՀՀ ԱԳՆ մամլո ծառայությունը, հանդիպման ընթացքում ծավալվեց շահագրգիռ եւ մանրամասն զրույց դինամիկ կերպով զարգացող երկկողմ հարաբերությունների, ինչպես նաեւ փոխադարձ հետաքրքրություն ներկայացնող միջազգային եւ տարածաշրջանային մի շարք հրատապ եւ հեռանկարային հարցերի շուրջ: Կողմերը մանրամասն կանգ առան Հարավային Կովկասի զարգացումների, մասնավորապես առկա հակամարտությունների կարգավորման ուղիների, ինչպես նաեւ տրանսպորտային ցանցի վերականգնման հնարավորությունների վրա` այդ հարցում ընդգծելով խաղաղ եւ բանակցային լուծումների կարեւորությունը: Հանդիպման ընթացքում քննարկվել են Իրանի շուրջ ծավալվող իրադարձությունների, ինչպես նաեւ Հայաստան-Թուրքիա հարաբերությունների հետ առնչվող հարցերը: