Դեկտեմբերի 25-ին Կիևում տեղի է ունեցել Ուկրաինայի հայերի միության «Հայագիտության արդի հարցեր» գիտական հանդեսի երկրորդ թողարկման շնորհանդեսը:

Ինչպես նշել է Ուկրաինայի հայերի միության պատմամշակութային ժառանգության հարցերի կոմիտեի ղեկավար Դավիթ Դավթյանը, թողարկման մեջ հավաքվել են 26 հետազոտողների աշխատանքներ, որոնք ներկայացրել են իրենց նյութերը Բերեժանիի միջազգային գիտաժողովում 2014-ի սեպտեմբերին:

Ըստ գիտնականի, արդեն բարի ավանդույթ է դարձել ՈւՀՄ պատմամշակութային ժառանգության հարցերի կոմիտեի կողմից հայագիտական աշխատությունների հրատարակությունը:

Ինչպես ասել է Դավիթ Դավթյանը, հրատարակության pdf-տարբերակը հասանելի կլինի նաև համացանցից օգտվողների համար, հայտնում է AnalitikaUA.net-ը:

Ինչպես ավելի վաղ նշել էր Ուկրաինայի հայերի միության նախագահ Վիլեն Շատվորյանը, գիտությունն ավանդաբար գտնվում է կազմակերպության ուշադրության կենտրոնում:

«Ստեղծելով հարթակ Ուկրաինայում հայերի բազմադարյա պատմության ուսումնասիրության համար՝ մենք կարևոր փաստեր ենք բացահայտում գալիք սերունդների համար: Դա լավ հիմք է հետագա դինամիկ զարգացման համար, և մենք հետևողականորեն աշխատելու ենք այդ ուղղությամբ»,-ասել է Շատվորյանը:

Դեկտեմբերի 25-ին Կիևում տեղի ունեցավ Ուկրաինայի հայերի միության ամփոփոիչ խորհրդաժողովը: Նիստում ընթերցվեցին Ուկրաինայի նախագահ Պորոշենկոյի, Ուկրաինայի վարչապետ Յացենյուկի ողջույնի խոսքերը: Ներկաներին ողջունեցին Ուկրաինայում ՀՀ դեսպան Անդրանիկ Մանուկյանը և ՀԱԵ ուկրաինական թեմի առաջնորդ արքեպիսկոպոս Գրիգորիս Բունիաթյանը:

Խորհրդաժողովին մասնակցել են տարածաշրջանային համայնքների ղեկավարներ, երիտասարդական կազմակերպությունների նախագահներ, հոգևորականության ներկայացուցիչներ, պատվավոր հյուրեր Ուկրաինայի ու Լեհաստանի տարբեր շրջաններից:

Խորհրդաժողովի ժամանակ քննարկվել են հայկական սփյուռքի արդի հարցեր, նախանշվել են 2015-ի առաջնայնությունները: