Ուկրաինայի և Լեռնային Ղարաբաղի հակամարտությունները կարող են հանգուցալուծվել միայն խաղաղ քաղաքական ճանապարհով, հայտարարել է ՀԱՊԿ գլխավոր քարտուղար Նիկոլայ Բորդյուժան «Վեստի 24» հեռուստաալիքին տված հարցազրույցում: «Այսօր այլընտրանք չկա հակամարտությունների խաղաղ կարգավորմանը: Դա վերաբերում է ոչ միայն Ուկրաինային, այլ, նաև Լեռնային Ղարաբաղին»,-ասել է Բորդյուժան:
Նա նշել է, որ ՀԱՊԿ ղեկավարության դիրքորոշումն այն է, որ Ուկրաինայում առաջացած հիմնախնդիրը չունի ռազմական լուծում: «Խաղաղ համաձայնագիր է պետք, պետք են խնդիրների լուծման քաղաքական ձևեր: Ես կողմ եմ, որ բոլոր այդ հակամարտությունները լուծվեն միայն քաղաքական ճանապարհով»,-ասել է Բորդյուժան:
ՀԱՊԿ գլխավոր քարտուղարը նշել է նաև, որ Կազմակերպության անդամ պետությունները ստեղծելու են անվտանգության համակարգ, որն ունակ է պատասխանելու ՆԱՏՕ-ի գործողություններին, սակայն ՆԱՏՕ-ին թշնամի չի համարում:
«Մենք չպետք է պատասխանենք սադրիչ գործողություններին, սակայն պետք է ստեղծենք անվտանգության այնպիսի համակարգ, որը կկարողանա պաշտպանել մեզ ցանկացած չմտածված արկածախնդրությունից, այդ թվում ՆԱՏՕ-ի»,-ասել է Բորդյուժան՝ պատասխանելով այն հարցին, թե ինչպես է ՀԱՊԿ արձագանքելու Դաշինքի ներկայության ընդլայնմանը կազմակերպության սահմանների մոտ: ՆԱՏՕ-ի որոշումը ՌԴ սահմանների մոտ ռազմական խմբավորումների ավելացման մասին, այդ թվում ռազմական ավիացիայի, Բորդյուժան հակաարդյունավետ քայլ է համարել:
«Սրանք ահաբեկմա՞ն գործողություններ են: Բայց դրանք ոչ մի արդյունք չեն տալիս»,-ասել է նա: ՀԱՊԿ-ը չի ենթադրում ռազմական հակամարտության հնարավորություն ՆԱՏՕ-ի հետ: «Մինչև վերջերս ՆԱՏՕ-ն մեր կողմից ընկալվում էր որպես գործընկեր»,-ասել է Բորդյուժան:
«Ուկրաինան ցույց տվեց, թե ինչու կյանքի չկոչվեցին ՀԱՊԿ-ՆԱՏՕ ձևաչափի շփումներն ու գործակցությունը: Այլ էին քաղաքական պատճառները: Այնպես էր պետք անել, որ Ռուսաստանի հարևանությամբ լարվածության օջախ հայտնվեր: Եվ այստեղ ՆԱՏՕ-ի անդամ պետությունները վերջին դերը չխաղացին»,-հայտարարել է Բորդյուժան:
Դեկտեմբերի 18-ին Ուկրաինայի նախագահ Պյոտր Պորոշենկոն օրենք ներկայացրեց Գերագույն ռադայի քննարկմանը երկրի արտադաշինքային կարգավիճակից հրաժարվելու մասին: Արդեն դեկտեմբերի 23-ին խորհրդարանը հավանություն տվեց առաջարկին: Հիմնավորման մեջ ասվում էր, որ «դա թույլ կտա ինքնիշխանության ապահովման, տարածքային ամբողջականության ու անկախության պաշտպանության լրացուցիչ մեխանիզմներ ստեղծել»:
«Արտադաշինքային կարգավիճակից հրաժարվելու մասին Ուկրաինայի խորհրդարանի որոշումը չի սպառնում ՌԴ անվտանգությանը, քանի որ դա քաղաքական որոշում է, սակայն եթե այն հետագայում ռազմական իմաստ ստանա (անդամակցում ՆԱՏՕ-ին), ապա մենք համարժեք կգործենք: Այդ դեպքում ՆԱՏՕ-ի հետ ամբողջական խզում կլինի, որը վերականգնել հնարավոր չի լինի»,-ասել է Անտոնովը:
Դեռ նոյեմբերին Բորդյուժան հայտարարեց, որ ՀԱՊԿ-ը դադարեցրել է ՆԱՏՕ-ի հետ երկխոսություն հաստատելու ջանքերը՝ «Դաշինքի ապակառուցողական և թշնամական գործողությունների» պատճառով:
«Հաշվի առնելով ապակառուցողական ու հաճախ թշնամական գործողությունները ՆԱՏՕ-ի կողմից Ռուսաստանի ու ՀԱՊԿ դեմ… դադարեցվում են ՆԱՏՕ-ի հետ երկխոսություն հաստատելու ջանքերը»,-հայտարարել է նա՝ ելույթ ունենալով ՀԱՊԿ խորհրդարանական վեհաժողովում:
Գլխավոր քարտուղարը նշել է, որ կազմակերպությունը զարգացնելու է հետագա գործակցությունը ԵԱՀԿ հետ, ամրապնդելու է գործակցությունը ՇՀԿ հետ ու կապեր է հաստատելու Լատինական Ամերիկայի երկրների ու Իրանի հետ»:
Հունիսին Բորդյուժան հայտարարեց, որ ՀԱՊԿ ԱԳ նախարարների խորհուրդը անհրաժեշտ է համարել դադարեցնել ՆԱՏՕ-ի հետ երկխոսության հաստատման փորձերը:
Ավելի ուշ ՀՀ ԱԳ փոխնախարար Շավարշ Քոչարյանը նշեց, որ ՀԱՊԿ գլխավոր քարտուղարի հայտարարությունը չի վերաբերում կազմակերպության անդամ երկրներին: Ըստ նրա, Բորդյուժայի խոսքերը վերաբերվում են միայն ՀԱՊԿ-ՆԱՏՕ ձևաչափին: «Բորդյուժայի հայտարարությունը վերաբերվում է կոնկրետ երկու կազմակերպությունների հարաբերություններին, ոլ թե անդամ երկրներից որևէ մեկի հարաբերություններին ՆԱՏՕ-ի հետ»,-ասել էր Շավարշ Քոչարյանը:
