Իսրայելի նախագահ Ռեուվեն Ռիվլինը ապրիլի 26-ին Երուսաղեմի իր նստավայրում ընդունել է երկրի հայ համայնքի ներկայացուցիչների` նրանք քննադատել են հրեական պետությանը Հայոց ցեղասպանությունը չճանաչելու համար:
Ինչպես ասվում է Իսրայելի նախագահի մամուլի հաղորդագրության մեջ, Ռիվլինն օգտագործել է «զանգվածային սպանություններ», «հայկական ողբեգրություն» եզրույթները, ինչպես նաև ասել է, որ Իրսյալեի իշխանությունները չեն ձգտում մեղքը բարդել որևէ «կոնկրետ երկրի վրա», հայտնում է ՌԻԱ Նովոստի գործակալությունը:
«Մենք բարոյապես պարտավոր ենք մատնանշել փաստերը, որքան էլ դրանք սարսափելի լինեն: Մենք չպետք է անտեսենք դրանք: Հայ ժողովուրդը դարձավ ժամանակակից զանգվածային սպանությունների առաջին զոհը: Մենք չենք ձգտում մեղքը բարդել որևէ կոնկրետ երկրի վրա, սակայն համերաշխություն ենք հայտնում…կոտորածի զոհերի հետ»,-ասել է Ռիվլինը:
«Հոլոքոսթի սարսափներից հետո մեր` հրեաների մարդկային և բարոյական պարտավորությունն է հարգել հայ ժողովրդի ողբերգության զոհերին: Ես հպարտ եմ ձեզ ընդունել այստեղ` նախագահի նստավայրում, այդ օրը ձեզ հետ միասին նշելու համար»,-ասել է Ռիվլինը հայ համայնքի ներկայացուցիչներին, որոնք առաջին անգամ նման առիթով էին հրավիրվել Իսրայելի նախագահի նստավայր:
Հանդիպման մասնակիցներից մեկը` Երուսաղեմի հայկական պատրիարքության ներկայացուցիչ, արքեպիսկոպոս Արիս Շիրվանյանն իր «հիասթափությունն է հայտնել առ այն, որ Իսրայելը ցեղասպանություն չի անվանում հայերի սպանությունները», ասվում է մամուլի հաղորդագրության մեջ: «Նախագահը հայտարարեց, որ ի գիտություն է ընդունել քննադատությունը և համարում է, որ Իսրայելի ղեկավարությունը պետք է ավելին անի հայերի սպանությունների հարցը բարձրացնելու համար: Նա կարևորել է տեղի ունեցած բանավեճը»,-ասվում է հաղորդագրության մեջ:
Երևանում Հայոց ցեղասպանության 100-րդ տարելիցի ապրիլի 24-ի ոգեկոչման արարողություններին Իսրայելը ներկայացված էր պատվիրակությամբ, որի կազմում էին Հայաստանում Իսրայելի դեսպանն ու երկու խորհրդարանականներ: Նրանցից մեկը` ընդդիմադիր «Սիոնիստական ճամբար» ընդդիմադիր կուսակցությունից ընտրված Քնեսեթի փոխնախագահ Նահման Շայը կոչ արեց իր հայրենակիցներն ճանաչել Հայոց ցեղասպանությունը: «Դա մեր տարրական պարտականությունն է: Մենք այլևս չպետք է տատանվենք»,-ասել է նա:
