Արցախի գյուղական բնակավայրերում ապրող երիտասարդ ընտանիքներին անհատույց պետական ֆինանսական աջակցություն է տրամադրվելու բնակելի տներ կառուցելու նպատակով՝ ` մինչև 3 մլն դրամ գումարի սահմաններում: Դա ԼՂՀ կառավարության նոր ծրագրերից է՝ 2012-2017 թվականների գործունեության ծրագրի շրջանակում: Այն ուղղված է գյուղական բնակավայրերում մշտապես բնակվող երիտասարդ ընտանիքների սոցիալ-կենցաղային խնդիրների լուծմանը, բարենպաստ պայմանների ստեղծմանն ու բնակելի տներով ապահովմանը, տեղեկացնում են ԼՂՀ կառավարության աշխատակազմի տեղեկատվության և հասարակայնության հետ կապերի բաժնից:
ԼՂՀ վարչապետ Արայիկ Հարությունյանը նշել է, որ ծրագրի նպատակն է վերացնել հիպոթեքից օգտվելու հնարավորություն ունեցող քաղաքաբնակների և դրանից զուրկ գյուղաբնակների միջև սոցիալական անարդարությունը՝ պետբյուջեից հավասարաչափ օգտվելու հնարավորություն ստեղծելով բոլոր քաղաքացիների համար։
Վարչապետի խոսքով՝ շինարարությունը պետք է վերահսկվի, որպեսզի այն իրականացվի համապատասխան չափորոշիչներով և սեյսմակայունության ապահովման և տեղանքի ճիշտ ընտրության պայմաններում:
Արցախի կառավարության ղեկավարը նաև նշել է, որ բոլոր այս ծառայությունները կմատուցվեն պետության կողմից` անվճար, որպեսզի ցուցաբերվող օգնությունն արդյունավետ լինի: Անհրաժեշտության դեպքում ծրագիրը կվերանայվի` ընթացքում առաջացող խնդիրները լուծելու նպատակով: