Ոստիկանությունը հուլիսի 6-ին ժամը 12:30-ին, ինչպես հայտարարել էին ավելի վաղ, Բաղրամյան պողոտայից հեռացրել է բարիկադ-աբղամանները, այնուհետև՝ նաև ցուցարարներին՝ բացելով երթևեկելի հատվածը: Պողոտայում երթևեկությունը վերականգնված է:

Ոստիկանության ծառայողների ձեռնարկած գործողություն արդյունքում ոստիկանության բաժիններ բերման է ենթարկվել 46 անձ, որոնցից 6-ն անչափահաս է:

Երևանի փոխոստիկանապետ Վալերի Օսիպյանը լրագրողների և ցուցարարների հետ զրույցում նշեց, որ բերման ենթարկված ցուցարարների նկատմամբ բռնությւոն չի կիրառվելու և բոլորը բաց են թողնվելու 3 ժամվա ընթացքում:

Ավելի ուշ հայտնի է դարձել, որ բերման ենթարկված անչափահաս 6 քաղաքացին անմիջապես ազատ են արձակվել, իսկ մյուս 40 ցուցարարը նույնպես արդեն իսկ ազատ են:

Բարիկադների դեր տանող աղբամաններն իրար միացնող ժապավենները ոստիկանները կտրել են, ապա հեռացրել պողոտայի մեջտեղից: Այդ նույն պահին հավաքի մասնակիցները վանկարկում էին՝ «Ոստիկանից չենք վախում», «Մենք ենք տերը մեր երկրի», «Հաղթանակը մերն է», «Ազատ, անկախ Հայաստան», «Ամոթ, ամոթ» և այլն:

Բարիրկադներն ապամոտնաժելուց հետո Երևանի փոխոստիկանապետ Վալերի Օսիպյանը կոչ է արել ցույցի մասնակիցներին միասին վերականգնել Բաղրամյանի նախկին տեսքը՝ մաքրել աղբից, ազատել այն. «Վերականգնենք նախկին տեսքը, որը միշտ եղել է՝ մաքուր և գեղեցիկ»:

Ի պատասխան ցուցարարները նշել են, թե նոր բարիկադներ են դնելու, սակայն ոտիկանները թույլ չեն տվել: Ազգային ժողովի պատգամավոր Նիկոլ Փաշինյանը փոխոստիկանապետ Հունան Պողոսյանի հետ զրույցում նշեց, թե բռնությունը պետք է բացառել:

«Բռնություն չի լինելու, մենք հորդորում, խնդրում, պահանջում ենք, որ իրենք ազատեն երթևեկելի մասը: Բռնություն չենք կիրառելու, իրենց հեռացնելու ենք ճանապարհի բանուկ մասից»,- ասել է Հունան Պողոսյանը՝ Նիկոլ Փաշինյանին կոչ անելով օգտագործել սեփական հեղինակությունն ու բացել փողոցը: «Բարգավաճ Հայաստան» խմբակցության անդամ Էլինար Վարդանյանն էլ նշել է, թե դժվարանում է գնահատական տալ տեղի ունեցող իրադարձություններին.

«Բոլորիս գերխնդիրն է, որ մասնակիցներից որևէ մեկի նկատմամբ բռնություն չկիրառվի և օրենքի խախտումներ չարձանագրվեն: Երկու կողմերն էլ պետք է ողջախոհ և ավելի զգոն լինեն, որպեսզի չկրկնվի հունիսի 23-ի իրադարձությունները»:

ՀՀ ոստիկանությունը հուլիսի 6-ի առավոտյան հայտարարություն է տարածել՝ նշելով, որ պատրաստվում է վերականգնել Բաղրամյան պողոտայի մոտ երկու շաբաթ խաթարված երթևեկությունը, այդ թվում՝ դրան խոչընդոտող առարկաները պողոտայի երթևեկելի հատվածից հեռացնելու միջոցով:

Ոստիկանության տարածած հաղորդագրության մեջ նշվում է, որ ՀՀ ոստիկանության՝ Բաղրամյան պողոտայի արգելափակումը ինքնակամ վերացնելու մասին հորդորները վերջին մի քանի օրերի ընթացքում ամբողջությամբ անտեսվել են: Այդուհանդերձ, ՀՀ ոստիկանությունը ևս մեկ, և վերջին անգամ, առաջարկել է հավաքի կազմակերպիչներին և մասնակիցներին մինչև ժամը 12:30-ը ինքնակամ վերացնել Բաղրամյան պողոտայի արգելափակումը: Հակառակ դեպքում, ժամը 12.30-ից սկսած ՀՀ ոստիկանությունը դա կիրականացնի իրեն վերապահված լիազորությունների գործադրման միջոցով:

ՀՀ ոստիկանությունը հայտարարել է նաև, որ վերոնշյալ գործողությունները նպատակաուղղված չեն լինելու հավաքի դադարեցմանը, եթե այն շարունակվելու է Բաղրամյան պողոտայի ոչ երթևեկելի հատվածում և չի խոչընդոտելու դրա բնականոն ընթացքին:

Կարդացեք նաև՝Բաղրամյանը շարունակում է փակ մնալ. Ոստիկանությունը պատրաստվում է 12:30-ին բացել այն