Հոկտեմբերի 23-ին «Կոնվերս» վերապատրաստման կենտրոննիր դռներն է բացել երիտասարդների համար: Առաջին դասը վարել է Կոնվերս բանկի գործադիր տնօրեն Տիգրան Դավթյանը:
«Երիտասարդները ցանկացած երկրի հիմնական ուժն են և ապագան, հասարակության առավել դինամիկ, բայց միևնույն ժամանակ առավել խոցելի մասը: Պետք է խրախուսել և աջակցել, ստեղծել բարենպաստ պայմաններ երիտասարդների առաջընթացի համար` կյանքում և կարիերայում», - ասել է Տիգրան Դավթյանը:
«Կոնվերս» վերապատրաստման կենտրոնը հնարավորություն է ընձեռնում ցանկացողներին ստանալ գիտելիքներ և գործնական հմտություններ ֆինանսաբանկային ոլորտում: Դասընթացներին կարող են մասնակցել բուհերի ավարտական կուրսերի ուսանողները, բանկային ոլորտում աշխատող մասնագետները, ինչպես նաև բոլոր նրանք, ովքեր ցանկանում են նոր մասնագիտություն ձեռք բերել:
«Համոզված ենք, որ ֆինանսաբանկային ոլորտում հմուտ ու կրթված կադրերի առկայությունը կհանգեցնի ոչ միայն նշված ոլորտի, այլև Հայաստանի ամբողջ տնտեսության վերելքի»,- ավելացրել է Տիգրան Դավթյանը:
Կենտրոնի դասընթացները վարում են Բանկի պրոֆեսիոնալ և փորձառու աշխատակիցները: Դրանց ավարտին մասնակիցները հավաստագրեր կստանան, իսկ լավագույն արդյունքները ցուցաբերած ուսանողները կհամալրեն Կոնվերս բանկի թափուր աշխատատեղերը կամ կընդգրկվեն կադրային ռեզերվում:
