ԵՏՄ-ում օրենսդիր գործունեություն իրականացնելու համար ստեղծված հատուկ հանձնաժողովը հավանության է արժանացրել Եվրասիական տնտեսական միության և Վիետնամի միջև՝ ազատ առևտրի վերաբերյալ համաձայնագրի վավերացման մասին օրինագիծը և դրան կից արձանագրությունները:
Համաձայնագիրն ամրապնդում է շուկաներում ապրանքների մուտքի հեշտացման վերաբերյալ երկկողմ պարտավորությունները: Կից արձանագրությամբ պարզաբանվում է Ռուսաստանի և Վիետնամի միջև ապրանքների, ընկերությունների ստեղծման և գործունեության, ինչպես նաև ֆիզիկական անձանց փոխադրման վերաբերյալ պարտավորությունների ցանկը, «ՏԱՍՍ»-ին հղումով գրում է Panorama.am-ը:
Մեկ այլ արձանագրությամբ կանոնակարգվում է Ռուսաստանի և Վիետնամի հարաբերությունները՝ ելնելով Առևտրի միջազգային կազմակերպության (ԱՄԿ) առջև ստանձնած պարտավորություններից:
«Համաձայնագրի իրագործումը կնպաստի երկկողմ ապրանքաշրջանառության և մասնակիցների միջև առևտրատնտեսական կապերի ամրապնդմանը, պայմաններ կստեղծի ասիական-խաղաղօվկիանոսյան շրջանում ընթացող ինտեգրացիոն գործընթացներին ԵԱՏՄ-ին ընդգրկելու համար»,- նշված է փաստաթղթում:
ԵՏՄ-ին անդամակցող Ռուսաստանի, Բելառուսի, Ղազախստանի Հայաստանի և Ղրղզստանի ու Վիետնամի միջև համաձայնագիրը ստորագրվել է 2015թ. մայիսի 29-ին:
