Քուրդ քաղաքական գործիչներն անհրաժեշտ են համարում, որ իրավիճակը Թուրքիայի քրդաբնակ շրջաններում քննարկման դրվի ՄԱԿ Անվտանգության խորհրդում և աշխատում են այդ ուղղությամբ ռուս դիվանագետների հետ: Այդ մասին հայտարարել է Մոսկվայում Քրդստանի ազգային կոնգրեսի ներկայացուցիչ Սելահադդին Սորոն:
«Մենք ցանկանում ենք, որ Ռուսաստանն այդ հարցը բարձրացնի ՄԱԿ Անվտանգության խորհրդում և որ ԱԽ-ն բանաձև ընդունի: Մենք աշխատում ենք ՌԴ իշխանությունների և դիվանագետների հետ այդ ուղղությամբ»,-ասել է նա:
Քրդստանի ազգային կոնգրեսը հիմնվել է 1999 թ. Ամստերդամում: Կոնգրեսը բաղկացած է եվրոպական քրդամետ կազմակերպություններից: Գլխավոր գրասենյակը գտնվում է Բրյուսելում, ներկայացուցչություններ կան աշխարհի շատ երկրներում: Կազմակերպության նպատակն է քրդերի շահերի լոբբինգը ԵՄ, ՄԱԿ և այլ միջազգային կազմակերպությունների կառույցներում: Կազմակերպությունը սերտ կապեր ունի աշխարհի քրդական համայնքների հետ:
Մոսկվայում Արևմտյան Քրդստանի ներկայացուցչություն է բացվել, որն աշխատելու է ոչ կառավարական կազմակերպության կարգավիճակով: Ներկայացուցչության աշխատակիցները մտադիր են նպաստել սիրիական ճգնաժամի հանգուցալուծմանը:
