100LIVES նախաձեռնության ներկայացուցիչները մարտի 3-ին Երևանի Թումոյում ծանոթացել են ուսանողների հետ, որոնք #Tumo4Aurora գործակցության շրջանակում աշխատում են «Ավրորա» մրցանակի ձևավորման վրա ու ևս մեկ անգամ քննարկել նախագծի նպատակներն ու ընթացքը:

2015-ին Նյու Յորքում մարտի 10-ին մեկնարկել է 100 LIVES նախաձեռնությունը, որի նպատակն է երախտագիտություն արտահայտել այն անհատներին ու կազմակերպություններին, որոնց ջանքերի շնորհիվ 100 տարի առաջ` Հայոց ցեղասպանության ժամանակ, բազմաթիվ հայեր են փրկվել: 100 LIVES նախաձեռնությամբ սահմանվել է նաև «Ավրորա» մրցանակը, որը ենթադրում է նաև $1 մլն-ի նվիրաբերում. հաղթողը գումարը հատկացնելու է այն կազմակերպությանը, որը նրան ոգեշնչել է մարդասիրական քայլեր կատարել:

4 աշխատարան, 4 ղեկավար, 22 ուսանող. 3.5 շաբաթվա ընթացքում խմբերը կաշխատեն, կմտածեն, կնախագծեն ու կգործակցեն՝ ստեղծելու «Ավրորա» մրցանակի ձևավորման տարբերակներ: Դրանք կներկայացվեն 100LIVES-ի ստեղծագործական խորհրդին մարտի 15-ին:

Խմբերի առաջնորդները՝ Թալա Սաֆին, Ռուբեն Մալայանը, Այման Հասանը և Արա Ասլանյանը նույնքան տարբեր են, որքան ուսանողները, այնպես որ ակնհայտ է, որ առաջարկներից յուրաքանչյուրը իր յուրահատկությունը կունենա:

«Ավրորա» մրցանակի ընտրող հանձնաժողովի անդամներն են օսկարակիր դերասան Ջորջ Քլունին, Խաղաղության Նոբելյան մրցանակակիրներ Էլի Ուիզելն ու Օսկար Արիասը, ՄԱԿ-ի Մարդու իրավունքների հարցերով նախկին գերագույն հանձնակատար Մերի Ռոբինսոնը, Ցեղասպանության հարցերով ՄԱԿ-ի գլխավոր քարտուղարի խորհրդական Գարեթ Էվանսը, մարդու իրավունքների ճանաչված պաշտպան Հինա Ջիլանին և Նյու Յորքի Քարնեգի հիմնադրամի նախագահ Վարդան Գրեգորյանը։

2016-ի ապրիլի 24-ին Երևանում Ջորջ Քլունին հաղթողին կհանձնի անդրանիկ «Ավրորա»-ն:

Բեյրութցի Թալա Սաֆին ուզում է, որ իր ուսանողները ոչնչով չսահմանափակվեն, երբ նոր բան են ստեղծում:

«Իմ նպատակն է, որ պատանիները սովորեն՝ ինչպես օգտագործել իրենց անհատական մտքերն ու դրանցից մեծ արդյունք ստանալ: Նրանք պիտի գիտակցեն մրցանակի գաղափարը ու ստեղծեն այնպիսի մասշտաբային գործ, որը կվերաբերի ամբողջ աշխարհին»:

Թումոյի դասընթացավար Ռուբեն Մալայանը հավատում է, որ դիզայնի հաջողությունը պայմանավորված է արձանիկի էմոցիոնալ ազդեցությունը գիտակցելով:

«Կուզեի, որ աշխատարանի վերջում ուսանողները հասկանան, թե ինչ է նշանակում հա: Իրական հերոսություն սպասվում է մեզանից յուրաքանչյուրից ու այս մրցանակը հենց դա է ներկայացնում»:

Լիբանանցի գրաֆիկական դիզայներ Այման Հասանը հատկապես յուրովի է մոտենում ուսանողներին՝ օգնելով նրանց իսկապես մտածել, թե ինչ է նշանակում մրցանակը:

«Աշխատարանի առաջին օրը ես ուսանողներին այցեքարտերի մի կույտ տվեցի և առաջարկեցի դրանք պատռել: Նրանք ինձ մի քիչ տարօրինակ ձևով նայեցին, բայց արեցին խնդրածս: Երևի կարիք չկա ասելու, որ հաճույքով պատառոտեցին թղթերը, բայց հետո մի բան պատահեց: Առանց իմ որևէ ցուցումների ու ուղղությունների պատանիները վերցրեցին պատառոտված հատվածներից մի քանիսը ու դրանցով կոմպոզիցիաներ ստեղծեցին: Նրանք իսկույն հասկացան որ ոչնչացումից կարելի է գեղեցիկ մի բան ստեղծել: Ահա այդպես եմ ուզում որ իրենք մոտենան արձանիկի ստեղծմանը՝ տեսնեն ոչնչացման հնարավորությունը»:

Իսկ երևանցի դիզայներ Արա Ասլանյանը ամենաշատը հետաքրքրված է ստեղծագործական ընթացքով. «Ինձ համար ամենակարևորը ուսումնասիրության քննարկումների ու ազատ արտահայտման ընթացքին սովորելն է: Մնացած ամենը այդ հիմքից է կառուցվում:

Համոզված ենք, որ մրցանակի ձևավորման չորս տարբերակը ոչ միայն կլինեն ամենահաջողվածներից, այլև կարտացոլեն այն ժամանակը, որ պատանիները անցկացրել են Ավրորա մրցանակի մասին մտածելով և իրենց հատուկ վերաբերմունքը դրա գաղափարին»:

Չորս գաղափարը կգնահատի 100LIVES-ի ստեղծագործական խորհուրդը: Եթե գաղափարներից մեկը խորհրդի կողմից հաղթող ճանաչվի, այն կարող է կյանքի կոչվել և ընդգրկվել Ավրորա մրցանակի և մրցանակաբաշխության վիզուալ նյութերում: Բացի այդ, հաղթող խմբի ներկայացուցիչները, ինչպես նաև այն ուսանողը, ում առաջարկած կարգախոսն ու գունապնակը կօգտագործվեն աշխատանքներում, հնարավորություն կունենան մասակցել մրցանակաբաշխության միջոցառումներից մեկին UWC Դիլիջան քոլեջում: Եթե անգամ որևէ գաղափար հաղթող չճանաչվի՝ առաջարկված խորհրդանիշները կպատրաստվեն և կցուցադրվեն UWC Դիլիջանի քոլեջում, որպես թումոցիների կողմիցԱվրորա մրցանակի ստեղծարար մոտեցման դրսևորում: