Հռոմի պապ Ֆրանցիսկոսի այցը Հայաստան, հնարավոր է, կայանա հունիս ամսվա երկրորդ կեսին:

Այդ մասին է հայտարարել Վատիկանի մամլո խոսնակ Ֆեդերիկո Լոմբարդին՝ մեկնաբանելով որոշ ԶԼՄ-ներում տեղ գտած տեղեկություններն այն մասին, որ պապի այցը տեղի կունենա հունիսի 22-26-ին:

Ինչպես հայտնում է Վատիկանի ռադիոն, Լոմբարդին նշել է, որ վերջնական որոշումը դեռ չկա ու պապի այցի հստակ ժամանակահատվածը դեռևս հայտնի չէ:

2013-ի մայիսին հայ կաթոլիկների առաջնորդ Ներսես Պեդրոս XIX-ի հետ հանդիպմանը Ֆրանցիսկոսը հայտարարել էր, որ կցանկանար Հայաստան այցելել Հայոց ցեղասպանության 100-րդ տարելիցի կապակցությամբ և մասնակցել ոգեկոչման արարողությանը: Այցը չստացվեց, սակայն Հռոմի պապը պատարագ մատուցեց Վատիկանում` Հայոց ցեղասպանությունն անվանելով 20-րդ դարի երեք սարսափելի աղետներից մեկը: Ճնշումը նրա և Սուրբ Աթոռի վրա եղել է աննախադեպ: Թուրքական կողմն ամեն կերպ փորձել է խաթարել պատարագի անցկացումը, սակայն ջանքերը զուր են անցել: