Մարտի 16-ին Երևանի Սարալանջի պողոտայում՝ Անտառային փողոցի մոտակայքում, ճանապարհահատվածի փլուզման դեպքով ոստիկանությունը նյութեր է նախապատրաստում: Այս մասին PanARMENIAN.Net-ին հայտնեցին ՀՀ ոստիկանության հասարակայնության հետ կապի և լրատվության վարչությունից:
«Ոստիկանության Արաբկիրի բաժնում նյութեր են նախապատրաստվում, այնուհետև որոշվելու է դրա հետագա ընթացքը», - տեղեկացրեցին ոստիկանությունից:
Մարտի 16-ին Ազատության պողոտայի թիվ 1/21 շենքի դիմաց մոտ 15 մետր երկարությամբ և 8 մետր բարձրությամբ բետոնե հենապատը փլուզվել է և թափված հողազանգվածի հետ փակել Սարալանջի պողոտայի երթևեկելի հատվածը:
Տարածքի տեղազննման արդյունքում Ազատության պողոտայի թիվ 1/21 շենքի դիմաց՝ ասֆալտի վրա, նկատվել են մոտ 5 մետր երկարությամբ և մոտ 0.7 սմ լայնությամբ ճաքեր: Արտակարգ իրավիճակների նախարարը, փրկարար ծառայության տնօրենը, Արաբկիր վարչական շրջանի ղեկավարը ժամանել էին դեպքի վայր:
