Բեռլինի միջազգային կինոփառատոնում փետրվարի 14-15-ը տեղի կունենա իտալացի Պաոլո եւ Վիտորիո Տավիանի եղբայրների «Արտույտների ագարակը» ֆիլմի պրեմիերան: Ֆիլմը, որը Իտալիա-Ֆրանսիա-Իսպանիա-Բուլղարիա համագործակցության արդյունք է, պատմում է Հայոց ցեղասպանությունը վերապրած ընտանիքի մասին: Կինոնկարի համաշխարհային պրեմիերան կկայանա Բեռլինի «Ֆիլմ Պալաս» կինոթատրոնում: «Արտույտների ագարակը» ֆիլմի գլխավոր դերերը մարմնավորել են կանադահայ դերասանուհի Արսինե Խանջյանը, Ալեխանդրո Փրեզիոսին, Անջելա Մոլինան եւ այլք: Բեռլինի միջազգային փառատոնը, որը կոչվում է նաեւ «Բեռլինալե», աշխարհի ամենահեղինակավոր կինոփառատոներից է: Այն հիմնադրվել է 1951թ.-ին: Այս տարի այն անցկացվում է փետրվարի 8-18-ը: Փառատոնի պարգեւը ոսկե եւ արծաթե արջն է (արջը Բեռլինի խորհրդանիշն է), հաղորդում է «Երկիրը»: