Ռուսաստանի Պետդուման վավերացրել է Հայաստան մատակարարվող վառելիքի ու ալմաստների արտահանման տուրքի վերացման համաձայնագրի ժամկետը երկարացնող փոփոխությունները:
Հայկական կողմի խնդրանքով, փոփոխություններ են մտցվել նաև տուրքից ազատվող նավթամթերքի ցանկում: Գազից, դիզելից, բենզինից, այլ վառելիքից բացի արտահանման տուրքից կազատվի նաև պարաֆինը:
Համաձայնագիրը Հայաստանի և Ռուսաստանի կառավարությունների միջև կնքվել էր 2013 թվականի դեկտեմբերի 2-ին:
Նույն օրը՝ Հայաստան ՌԴ նախագահ Վլադիմիր Պուտինի այցելության ժամանակ, 12 համաձայնագիր ստորագրվեց, այդ թվում՝ Հայաստանին ռուսական գազի մատակարարման, կառավարության կողմից «ՀայՌուսգազարդ» ՓԲԸ-ին փոխհատուցում տրամադրելու, «ՀայՌուսգազարդ»-ի բաժնետոմսերի առուվաճառքի և հետագա գործունեության պայմանների, միջուկային անվտանգության մասին համաձայնագրեր, ինչպես նաև ստորագրվեց 2014-2018-ին Հայաստանի բնական գազ ներմուծելու մասին «ՀայՌուսգազարդ»-ի ու «Գազպրոմ էքսպորտ» ԲԲԸ-ի միջև գործարքը։