Քաշաթաղում կառուցվող Արիավան բնակավայրի առանձնատները պատրաստ են շահագործման: Չնայած ապրիլի 5-ից հետո Արիավանում աշխատող կապալառու կազմակերպությունների տեխնիկայի մեծ մասը տեխափոխվել է առաջնագիծ` ինժեներական աշխատանքներ կատարելու համար, այնուամենայնիվ, բարեկարգման ուղղությամբ աշխատանքները շարունակվել են, հայտնում է ԼՂՀ քաղաքաշինության նախարարության մամլո ծառայությունը:

Արիավանի առաջին թաղամասն ամբողջությամբ` 26 առանձնատնով, բոլոր ենթակառուցվածքներով պատրաստ է շահագործման: Այստեղ իրականացվել է հիմնապատերի և պատերի կառուցում, բոլոր առանձնատները շրջափակվել են մետաղական ցանկապատերով: Թաղամասը ջրաֆիկացված է:

Արիավանի 2-րդ թաղամասում արդեն 7 տանիք է կառուցվել: Մյուս մյուս առանձնատների տանիքների կառուցման աշխատանքները կավարտվեն հունիս ամսին: Ավարտվել են ներքին ջրամատակարարման ցանցի և կոյուղագծերի աշխատանքները, իսկ արտաքին ջրամատակարարման համար աշխատանքներ են տարվում: Բարեկարգման աշխատանքներ են տարվում նաև 3-րդ թաղամասում:

Աղբյուրի հաղորդմամբ` բնակավայրը նախատեսվում է շահագործման հանձնել սեպտեմբերի 2-ին` ԼՂՀ հռչակման 25-րդ տարեդարձին նվիրված տոնական միջոցառումների շրջանակում, հայտնում է Արցախպրեսը: