Հանրապետական կուսակցությունից ԱՄՆ նախագահի ամենահավանական թեկնածու համարվող Դոնալդ Թրամփը, անդրադառնալով Ֆլորիդայի Օռլանդո քաղաքում գիշերային ակումբի վրա հարձակմանը, կրկին կրկնել է իր հորդորը` արգելել մահմեդականների մուտքն ԱՄՆ:
«Այն, ինչ կատարվեց Օռլանդոյում, միայն սկիզբն է: Մեր իշխանությունները թույլ են ու անարդյունավետ: Ես կոչ եմ անում արգելել: Խստություն է հարկավոր»,-գրել է նա Twitter-ի իր միկրոբլոգում, հայտնում է BBC-ին:
Օռլանդո քաղաքի միասեռականների ակումբներից մեկի վրա հունիսի լույս 12-ի գիշերը հարձակման արդյունքում 50 մարդ է զոհվել, ևս 53-ը վիրավորվել։ Իրավապահ մարմիններում աղբյուրների փոխանցմամբ, կրակողը եղել է աֆղանական արմատներով ԱՄՆ քաղաքացի 29-ամյա Օմար Մատինը։ԱՄՆ նախագահ Բարաք Օբաման հրահանգել է դաշնային կառավարությանն աջակցել Օռլանդոյի իրավապահ մարմիններին:
Ավելի ուշ հայտնի դարձավ, որ «Իսլամական պետություն» ահաբեկչական խմբավորումը ստանձնել է ԱՄՆ Ֆլորիդա նահանգի Օռլանդո քաղաքի Pulse գիշերային ակումբում տեղի ունեցած հրաձգության պատասխանատվությունը:
Ընթերցեք նաև. ԻՊ-ն ստանձնել է Օռլանդոյի գիշերային ակումբում զինված հարձակման պատասխանատվությունը